Një zjarr ka përfshirë një sipërfaqe të madhe në fshatin Piraj të Lezhës. Flakët kanë përfshirë linjën hekurudhore, deri tani kanë shkrumbuar traversat prej druri në një gjatësi prej 500 metrash.
Në rrezik janë edhe disa banesa në këtë fshat, pasi flakët janë përhapur në disa drejtime, edhe për shkak të erës. Në terren ndodhen zjarrfikësit, të cilët, të ndihmuar edhe nga banorë të zonës, po punojnë për shuarjen e flakëve.
Një tjetër vatër zjarri në Lezhë është krijuar edhe në Lagjen Nen Tereza. Situata mbetet serioze pasi rrezikohen disa banesa. Zjarri po favorizohet nga era e fort dhe bimësia e shumtë në zonë, ndërkohë që është përfshirë dhe një pjesë e malit në superstradën që lidh Lezhën me Shkodrën, duke krijuar kështu tym dhe duke u bërë problematike për qarkullimin e automjeteve.
Terreni i thyer e ka bërë të pamundur vënien nën kontroll të zjarrit duke u përhapur më tej në zonën e banuar, ku tymi ka përfshirë të gjithë lagjen.
