Një vatër e re zjarri është regjistruar pasditen e sotme në bashkinë Klos..
Flakët kanë përfshirë një sipërfaqe të gjerë pyjore në vendin e quajtur Balgjaj, në fshatin Kurdari.
Për shkak të terrenit malor ka qenë e vështirë ndërhyrja nga toka, ndaj në ndihmë të forcave zjarrfikëse ka shkuar helikopteri “Cougar”.
Lajmin e bën të ditur ministri i Mbrojtjes Niko Peleshi, i cili nëpërmjet një postimi në rrjetet sociale ka ndarë pamje nga vendi ku ka rënë zjarr dhe ndërhyrja e helikopterit për të neutralizuar flakët.
“Helikopteri Cougar ka shkuar në ndihmë të forcave të angazhuara për shuarjen e zjarrit në vendin e quajtur Balgjaj, në fshatin Kurdari të bashkisë Klos. Flakët kanë përfshirë një sipërfaqe të gjerë pyjore. Era e fortë dhe terreni malor e kanë bërë të vështirë punën e efektivëve në terren, ndaj është kërkuar ndërhyrja nga ajri”, shkruan Ministri i Mbrojtjes, Niko Peleshi.
