Trajneri i Real Madridit, Zinedine Zidane nuk e ka fshehur dëshpërimin e tij pas barazimit 2:2 në udhëtim tek Borussia Dortmund në Ligën e Kampionëve të martën, duke e përsëritur deklaratën se: “Jemi të thyer”.
Rezervisti Andre Schurrle realizoi në minutën e 87-të duke ia siguruar një pikë Dortmundit – që barazoi për herë të dytë në ndeshje – dhe ia mohoi fitoren Realit e cila do t’i shkëpuste në tri pikë epërsi në krye të Grupit F.
Dortmund pati disa raste të tjera para golit të barazimit nga Schurrle, por Zidane prapë u ankua në dështimin e skuadrës së tij për t’i dhënë fund çështjes së fituesit në duelin që erdhi pas një tjetër barazimi 2:2 me Las Palmas, të shtunën e shkuar, përcjell “Zëri.info”.
“Ne jemi të thyer sepse luajtëm mirë në mbrojtje dhe sulm, luajtëm ashtu siç kishim plan të luajmë”, deklaroi ai.
“Në fund, është gjithmonë njësoj dhe kjo është ndeshja e tretë me radhë. Jam i thyer për futbollistët, nuk ishte ajo që meritonin. Në fund të ditës nuk është rezultat i keq, por kur luani kështu, ju ndiheni të thyer”, theksoi Zidane.
