Zinedine Zidane u shfaq para mediave në “Valdebebas”, në prag të takimit derbi kundër Atletico Madrid, që do të luhet të shtunën (ora 20:45). “Pas pauzës së kampionatit, lojtarët janë kthyer në formë të mirë. Disa probleme në të tilla raste mund të ndodhin, por mendoj se jemi plotësisht gati për nesër. Na pret një lojë e rëndësishme. Benzema? Karim është në listë, është me ne, është më mirë dhe i lumtur. Lëndimi i Morata? Janë gjëra që ndodhin dhe tani nuk do të fajësoj askënd. E vërteta është se jemi të mërzitur nga dëmtimi i Morata, por mund të ndodhë. Tani të gjithë duam që ai të jetë i qetë, të shërohet dhe të ribashkohet me grupin. Gjëja më e rëndësishme është që të shërohet shpejt dhe të mendojë për të nesërmen. A do të ndryshojë sistemin e lojës? Kjo do të shihet në fushën e lojës. Megjithatë, nuk do të thotë asgjë nëse luan apo jo Benzema. I dimë vështirësitë e lojës, sepse do të kemi përballë një kundërshtar shumë të mirë, por ne nuk do të ndryshojmë.
Mund të ndryshojnë lojtarët, por ideja jonë e të luajturit jo. Çfarë mësimi më dha humbja kundër Atletico Madrid, në La Liga, sezonin e kaluar? E humbëm ndeshjen, por thjesht analizuam çfarë shkoi keq në raport me kundërshtarin. Kurrë nuk përpiqemi t’i fyejmë rivalët, ndaj nuk ka vend për hakmarrje. E dimë shumë mirë se ky derbi do të jetë shumë i vështirë për të dyja ekipet. Natyrisht, më kujtohet humbja e kampionatit të kaluar. Humbja gjithmonë dhemb, por nuk jam duke menduar për atë ndeshje. Mendoj sesi nesër të bëjmë një lojë të mirë dhe të japim maksimumin për të fituar. Ne duam të vazhdojmë linjën tonë, jemi duke bërë mirë, por nuk kemi fituar asgjë. Ky është një derbi, një ndeshje shumë e bukur për të gjithë. Unë dua të jetë një ndeshje e mirë për të dyja palët. Sergio Ramos? Kur e takova atë për herë të parë, kishte më shumë flokë. Edhe unë, gjithashtu. Ai është kapiteni ynë, është një gëzim për ta parë të rikthehet me skuadrën. Është shumë e rëndësishme prania e tij, brenda dhe jashtë grupit. Ai është një lojtar i madh dhe një njeri i madh.
Real Madrid nuk fiton në “Calderon” që prej vitit 2013? Ky nuk është një test për mua. Kjo është një ndeshje kampionati, ku shanset e suksesit janë 50 me 50. Do të jetë një ndeshje e vështirë, por ne jemi ndërtuar si skuadër për gjëra të vështira. A më frikëson “Calderon”? Është një stadium shumë i bukur, me një tifozëri të madhe. Por, Real Madrid është mësuar të luajë dhe fitojë aty. Ankthi për Ronaldon? Ai është mirë, ka shumë energji dhe e karikon grupin. Unë dua të jetë gjithmonë kështu. Atletico Madrid? Eshtë një ekip, që merr më të mirën çdo vit, gjithmonë duke u përmirësuar. Ai ka një trajner shumë të mire, që ka ndryshuar shumë skuadrën, prej kohës kur ka mbërritur. Gjithmonë, kur flasin për Atletiko Madridin, thonë se mbrohet mirë. Unë mendoj se kjo skuadër është shumë më tepër se kaq.
A do të jetë një lojë e hapur? Tani për tani nuk di asgjë, nuk mund të përgjigjem. Unë nuk jam një magjistar. Kemi për të luajtur nesër dhe të shohim. Ne duam të shohim një lojë të mirë futbolli, asgjë më shumë. Nesër do të shihni se çfarë do të ndodhë. Griezmann? Për mua është mirë të jetë i gatshëm për të luajtur nesër. Kurrë nuk do të doja që një lojtar të lëndohet nga ekipi kundërshtar. Ai është një lojtar i rëndësishëm për Atletico Madrid dhe jam i lumtur për të. Është e vërtetë që duhet të jemi shumë të kujdesshëm ndaj Griezmann, por jo vetëm me atë.”
