Partia Demokratike ka kundërshtuar në Kuvend që mbledhjet e komisioneve parlamentare të bëhen online.
Gjatë fjalës së tij kreu i Grupit Parlamentar të PD, Rushaj ka deklaruar: Meqenëse diskutuam për përbërjen e komisioneve do të doja të sillja në vëmendje deputetëve që në konferencë kryetarësh u mor një vendim antikushtetues në lidhje me punën e komisioneve. Në mënyrë të jashtëligjshme në përputhje të Kushtetutës së Shqipërisë, u mor një vendim në gjykimin tonë i pavlefshëm që kufizon punën e që komisionet parlamentare të bëhen online. Rregullorja e thotë qartë se ku janë rastet kur veprimtarit e komisioneve të zhvillohen online. Janë rastet kur vendi ndodhet në gjendje lufte, të fatkeqësisë natyrore dhe masave të jashtëzakonshme. Në këto raste parashikohen kufizime. Ne, sot, nuk jemi në asnjë nga këto gjendje formale juridike për të cunguar punën e komisioneve parlamentare. E vetmja arsye se po bëhen këto janë për të eliminuar parlamentarizmin. Ne nuk e pranojmë. Kërkojmë që ai vendim i paligjshëm që u mor në konferencën e kryetarëve të hidhet poshtë dhe të vazhdohet në përputhje me rregulloren dhe kushtetutën.
Të njëjtin qëndrim ka mbajtur PD edhe në konferencën e kryetareve, ku PS ka kërkuar që mbledhjet e komisioneve parlamentare të bëhen online. PD ka kundërshtuar pasi kjo dëmton transparencën. Kuvendi ka hapësira për të bërë mbledhje komisionesh normalisht.
