Një student britanik, i akuzuar për zhvatjen e mijëra personave që vizitonin adresat pornografike në internet, është dënuar me gjashtë vite burg. Në 18 muaj aktivitet, 24-vjeçari Zain Qaiser fitoi rreth 800 mijë euro. Nëpërmjet hakerimit, ai zbulonte se cilët ishin vizitorët e adresave pornografike dhe i detyronte të paguanin shuma të ndryshme parash që të mos u publikonte identitetin.
Mendohet se ai bën pjesë në një grup më të madh hakerash, i cili mund të ketë zhvatur rreth 4 milionë paund nëpërmjet kësaj skeme. Qaiser është arrestuar edhe pesë vite më parë, por sipas BBC procesi ndaj tij u shty disa herë për shkak të kompleksitetit të hetimeve dhe dyshimeve mbi gjendjen e tij mendore. Qaiser konsiderohet si personi që ka kryer krimin më të madh informatik në Britani.
Mashtrimi, i organizuar me hakera të tjerë në Rusi, Kinë dhe SHBA funksiononte kështu: Qaiser kishte blerë hapësira publicitare brenda adresave pornografike më të vizituara, duke i futur një virus të quajtur “Anger”. Sa herë që një përdorues klikonte në foton e reklamës, virusi shkarkohej në kompjuter dhe merrte kontrollin e tij deri sa përdoruesi nuk paguante shumën e kërkuar, që varionte nga 100 deri në 200 sterlina. Së bashku me kërkesën për të paguar, shfaqej edhe një mesazh që dukej si i dërguar nga FBI, ku thuhej se përdoruesi kishte dhunuar ligjin dhe rrezikonte deri në 3 vite burg./Opinion.al
