Gazetari Artur Zheji në një shkrim në 360gradë.al ka theksuar se mediat qeveritare dhe specialistët e sharjes së opozitës, mbas fitores së aleancës së ripërsëritur Rama-Meta, kanë marrë hov dhe sulen për të dëmtuar me çdo mjet dhe metaforë, figurën e Lulzim Bashës.
Zheji shkruan se Bashën e paraqesin të brishtë, të paqëndrueshëm, problematikë, të frikësuar, të pasigurtë, mendjelehtë dhe plot të tjera si këto.
“Përshkrimi është i ngjashëm, me atë që bëhej për Ramën në vitin 2005, kur erdhi në krye të PS, ku dhe ai shprehte pasiguritë e veta fillestare”, shkruan Zheji.
Sipas tij, Lulzim Basha në mënyrën si vepron apo në mënyrën se si nuk vepron, padushim që mund të mos ketë mospërputhje me përfytyrimin kolektiv, që lidershipet partiake kanë krijuar në vite. Zheji vë në dukje, Basha nuk shtrëngon dhëmbët, nuk ka vështrim të egër dhe nuk kërcënon në mënyrë të personalizuar, kundërshtarët e tij politikë.
“Përfytyrimi kolektiv do të donte një “egërsirë” që kundër-shkëmben me egërsi, sulmet e ashpra të Ramës dhe ambicies së tij për të paktën 3 mandate qeverisëse. Kush nuk e di, duhet ta dijë se pikësynimi i kryeministrit aktual, është për të paktën 3 mandate qeverisëse njeri pas tjetrit”, shkruan ai.
Gazetari ka nënvizuar me të zezë faktin, se këtë vit, bumi i korrjeve kombëtare të kanabisit të këtij viti do të jetë spektakolar dhe do të fusë shumë para të thata në qarkullim.
“Prania e organizatave mafioze italiane është bërë shumë e dukshme. Ata po blejnë fillimisht struktura turistike, që shërbejnë si pikëmbështetje, për të zhvilluar tregtinë me shumicë të bimës së mrekullueshme”, shkruan Zheji.
Në këtë vazhdë, sipas gazetarit, është mëse e rëndësishme detyra e Opozitës, ajo që e kemi dhe ashtu si e kemi, sipas tij, është sot më e vështira, por edhe më e rëndësishmja. Zheji shkruan se Lulzim Basha do vazhdojë të jetë, njeriu më i sulmuar dhe më i vizatuar keq nga kundërshtari i vet politik.
“Lulëzim Basha, është sot për sot, njeriu i vetëm, që mund ti sjellë dhe duhet ti sjellë, pengesa reale diktaturës së kadifenjtë që po afrohet me shpejtësi dhe në verbëri të plotë të shumicës së blerë të mediave shqiptare”, shkruan ai.
