Deputeti i PD, Flamur Noka ka kërkuar informacione në Komisionin e Sigurisë Kombëtare, lidhur me fatin e të shumëkërkuarit Ervis Martinaj.
Ai theksoi se situata është alarmante ndërsa shtoi se shteti në këtë rast ose është i dorëzuar ose është bashkëpunëtor.
Më tej Noka tha se përgjigjen për fatin e Martinajt e kërkojnë qytetarët që paguajnë taksat ndërsa hodhi akuza të forta ndaj qeverisë duke thënë se është bërë njësh me mafien dhe ka një kod, atë të heshtjes.
“Është alarmante, situata shumë e rëndë. Unë bëra një pyetje e shteti duhet të përgjigjet, jo Flamur Nokës, detyrë ligjore komisionit, a ka informacion qeveria për Ervis Martinajn? A ka apo jo informacion. Pse? Qarkullojnë lloj lloj thashethemesh, thonë që shteti s’e gjeti dot kurrë por gjetën hasmin. A ka gjë më të rëndë kur nuk e gjen dot shteti? çfarë tregon? Që shteti në rastin më të mirë i dorëzuar në rastin më të keq i falimentuar.
Sot çdo shqiptar e kupton që kjo qeveri s’është në gjendje të ruajë as sigurinë e jetës as pronës, të paktën të ketë informacion cfarë po ndodh.
Këtu po hyn derri dhe dosa e shteti nuk di gjë. Këtu njerëzit po shtypen si kërpudha e shteti nuk është në gjendje të kuptojë kush e bëri.
Ose shteti është i dorëzuar ose është bashkëpunëtor se s’ka rrugë tjetër.
Këtë përgjigje e kërkojnë qytetarët zotërinj se paguajnë taksa për këtë zonjë që është zv ministre atje, për atë zotërinë që është ministër, për gjithë ato banditë që i keni veshur me uniformë. Pse i paguajnë?
Të paktën duhet të dinë çfarë ndodh. Nuk na duhet statistika, se ua them unë statistikat, lufta kundër krimit ka njohur arritje të papara, policia është në një standart më të madh se sa bashkëkohor, kështu do vijnë letrat këtu, krimi është struktur në letrat e qeverisë. Unë flas pë realitetin.
Këtu është bërë njësh mafia me shtetin e ka një kod, kod heshtje, është shumë e rëndë kur kodi i heshtjes së mafies të bëhet kodi i qeverisë. Kod heshtje ka vendosur zonja sot, ky është kodi i heshtjes”-tha Flamur Noka.
