Policia e Lezhës ka reaguar lidhur me zhdukjen e 34-vjeçares, sekretares së Gjykatës së Lezhës.
Sipas uniformave blu, kallëzimi për zhdukjen e sekretares Klaudia Marku është bërë nga bashkëshorti i saj, mbrëmë rreth orës 23:00.
Mësohet se pas administrimit të kallëzimit, është bërë shpallja në kërkim policor i 34-vjeçares dhe po punohet për gjetjen e saj.
“Më datë 06.04.2022, rreth orës 23:00, ka njoftuar sallën operative të Drejtorisë Vendore të Policisë Lezhë dhe më pas ka bërë kallëzim në Komisariatin e Policisë Lezhë, shtetasi O. Marku., 38 vjeç, banues në Lezhë, për largimin nga banesa, të bashkëshortes së tij, shtetases Klaudia Marku., 34 vjeçe.
Menjëherë, pas administrimit të kallëzimit, është bërë shpallja e kërkimit policor e kësaj shtetaseje dhe vijon puna për gjetjen e saj.
Gjithashtu, nga ana e Prokurorisë së Rrethit Gjyqësor Lezhë është regjistruar procedimi penal për këtë rast dhe nën drejtimin e Prokurorisë po kryhen veprime hetimore intensive, për sqarimin e rrethanave dhe motiveve të largimit nga banesa”,-njofton policia./Opinion.al
