Drejtori i Përgjithshëm i Policisë së Shtetit, Muhamet Rrumbullaku, ka shkuar pasditen e sotme, në Komisariatin e Policisë Sarandë, për të parë nga afër punën hetimore që po bëhet për gjetjen e dy personave të humbur në këtë qytet, Leonard Thodhorit, dhe mikut të tij Fatmir Sulovari.
Rrumbullaku pritet të zhvillojë një analizë të detajuar të punës së kryer deri në këto momente, për të vendosur për mënyrën se si Policia do të procedojë në vijim, mbi bazën e provave që ka mbledhur dhe administruar tashmë, me qëllim gjetjen e dy shtetasve.
Pak më herët ka mbërritur në Sarandë edhe Drejtori i Policisë së Vlorës, Ermal Muça.
Kujtojmë se mëngjesin e sotëm familjarët e dy të zhdukurve kanë protestuar para Policisë së Shtetit.
Me foto të tyre në duar, familjarët kërkojnë angazhimin e policisë për të zbuluar vendndodhjen e dy 46-vjeçarëve.
