Në një konferencë për mediat të mbajtur këtë të mërkurë teksa prezantoi prioritetet për vitin 2023 ministri i Brendshëm, Bledi Çuçi, u pyet nga gazetarët edhe për hetimet në lidhje me zhdukjen e Ervis Martinajt.
Çuçi tha se publiku është informuar për veprimet policore për zbardhjen e zhdukjes së Vis Martinajt, ndërsa theksoi se do të ketë një komunikim nga policia vetëm nëse do ketë një provë të fortë lidhur me çështjen.
“Policia ka bërë dhe vazhdon të bëjë punën për të zbardhur këtë ngjarje. Ju keni qenë të informuar për veprime të ndryshme policore që ka ndërmarrë dhe lidhen me zbulimin dhe zbardhjen e kësaj ngjarje. Policia e Shtetit vepron sipas ligjeve dhe ka përgjegjësi ligjore për të deklaruar një fakt, qoftë juridik ose jo. Nga Policia e Shtetit do të merrni një përgjigje përfundimtare vetëm kur të ketë një provë të fortë çfarë ka ngjarë me këtë personash. Historia botërore është e mbushur me raste të tilla ku figura të rëndësishme të krimit të organizuar në botë ende sot e kësaj dite organet shtetërore nuk kanë një përgjigje për fatin e tyre. Policia e Shtetit ka një vëmendje të posaçme dhe merret çdo ditë me zbardhjen e kësaj historie”-tha Çuçi.
