Avokati Besnik Muço rezulton i zhdukur prej 10 ditësh. Sot mësohet se në tragetin ku ai kishte hipur për të shkuar në Itali janë gjetur xhupi, kartë qëndrimi italiane, çanta me sendet personale. Të dhënat janë mësuar nga prokuroria e Durrësit, burimet e së cilës thanë se nuk është gjetur pasaporta shqiptare e avokatit.
Sendet e gjetura ne sallen e pritjes se tragetit janë sekuestruar tashmë nga Prokuroria e Durrësit.
Muço kishte dokumente të rregullta qëndrimi në Itali ku prej vitesh jetonte me bashkëshorten dhe fëmijët, ndërsa kohët e fundit ai kishte nisur punën si avokat i lirë në Tiranë dhe e ndante jetën mes Italisë dhe Shqipërisë.
Familjarët kanë deklaruar se ai udhëtonte të paktën dy herë në muaj nga porti i Durrësit në Bari për të shkuar në Macerata.
Policia dyshon se duke marr parasysh faktin që Muco të jetë imbarkuar në traget, zhdukja e tij mund të ketë ndodhur gjatë udhëtimit në mënyrë misterioze (mund të jetë vetëhedhur nga trageti ose shtyrë nga persona te tjerë në det). Për këtë arsye, është urdhëruar që rojet bregdetare të patrullojnë përgjatë bregdetit shqiptar me qëllim për të verifikuar nëse trupi i tij ka dal në breg. Grupi hetimor po verifikon nëse avokati Besnik Muco ka pasur konflikte apo ndonjë mosmarrëveshje me ndonjë prej klientëve të tij, ndërkohë që ushtronte aktivitetin e avokatit të lirë në kryeqytet.
