Një ekspert është shprehur se avioni i pasagjerëve MH 370, i cili u zhduk 8 vite më parë është rrëzuar me qëllim.
Avioni i Malaysian Airlines me 239 persona në bord po fluturonte për në Kuala Lumpur nga Pekini më 8 mars 2014, kur u zhduk ndërsa fluturonte mbi Oqeanin Indian të Jugut.
Avioni kreu një kthesë në drejtim të kundërt pasi ishte në ajër për më pak se një orë dhe më pas shkoi në drejtim të kundërt nga ku duhej të ishte drejtuar.
Edhe pse kanë kaluar 8 vite nga ngjarja, nuk është gjetur një shpjegim për zhdukjen e avionit, ndërsa disa teori janë shfaqur gjatë viteve.
Së fundmi, kontrolluesi i trafikut ajror të Forcave Ajrore Franceze, Gilles Diharce ka ndarë mendimin e tij dhe sipas tij, piloti mund të kishte tentuar një “hapje të butë”, duke e zhytur kështu qëllimisht aeroplanin në det. Në këtë rast, mbeteshin shumë pak shanse që mbetjet e aeroplanit të dilnin në sipërfaqe.
Megjithatë, Diharce mendon se taktika nuk shkoi sipas planit dhe avioni u nda në disa pjesë pasi goditi ujërat e rrëmbyeshëm .
“Pse një person do të donte ta fluturonte avionin në mes të Oqeanit Indian? Është e mundur që personi që kontrollonte avionin nuk donte që askush ta gjente avionin në të ardhmen. Të zhdukej pa lënë gjurmë”, u shpreh Diharce për “The Sun”.
Diharce thotë se sistemi i komunikimit të avionit u ndez papritur teksa po shkonte drejt ujit, gjë që mund të jetë nxitur nga kalimi i piloti në sistemin e energjisë rezervë të avionit për të rimarrë kontrollin.
Kur u pyet për arsye se përse piloti Zaharie Ahmad Shah do të kishte dashur të rrëzonte aeroplanin, Diharce tha se nuk ishte i sigurt, por shtoi se piloti nuk kishte qenë për kontroll mjekësor për katër vjet, edhe pse pilotët duhet të kontrollohen çdo vit.
Teoria e Diharce pretendon se në momentet e tij të fundit, piloti mund të kishte ndezur sistemin e energjisë rezervë të avionit për të rimarrë kontrollin e avionit kur të dy motorët dështuan për shkak të shterrimit të karburantit.
