Gjykata e Krimeve të Rënda ka dhënë dënimin për autorët e dyshuar për rrëmbimin e Ridvan Lamaj, i zhdukur dy vite më parë në qytetin e Sarandës.
Gjykata dënoi me 19 vjet burg Viktor Islamin dhe Ardian Ogiçin me 20 vjet heqje lirie, por ky i fundit është ende në kërkim. Sipas akuzës të pandehurit rrëmbyen dhe zhdukën Lamajn, pas konflikteve për pazaret e drogës.
Sipas dëshmitarëve Ridvan Lamaj është parë për herë të fundit më 15 qershor 2015, kur është rrëmbyer me një automjet në qytetin e Sarandës dhe prej asaj dite nuk dihet më asgjë për të.
