Sokol Sadushi është zgjedhur zëvendëskryetar i Gjykatës së Lartë.
Vendimi u mor sot, në mbledhjen e përgjithshme të gjyqtarëve të Gjykatës së Lartë. Mësohet se Sadushi është zgjedhur me unanimitet të plotë, duke marrë 7 vota.
Pas 13 vjet përvoje profesionale si gjyqtar i Gjykatës Kushtetuese, z. Sadushi ka gëzuar, sipas ligjit, përvojën profesionale edhe si gjyqtar i Gjykatës së Lartë. Për afro 6 vjet ka ushtruar detyrën e Drejtorit të Shkollës së Magjistraturës, funksion i cili barazohet me atë të gjyqtarit të Gjykatës së Lartë dhe “njihet si periudhë vjetërsie në punë, si gjyqtar, për efekt të kërkesave të karrierës profesionale”.
Deri në zgjedhjen e Kryetarit të Gjykatës së Lartë, gjyqtari Sadushi, i sapozgjedhur në detyrën e Zëvendëskryetarit do të ushtrojë kompetencat e Kryetarit. /Opinion.al
