Është zgjedhur zyrtarisht kryetari i ri i Lidhjes Demokratike të Kosovës pas dorëheqjes së Isa Mustafës. Lumir Abdixhiku do të drejtojë LDK-në në Kosovë.
Ai garonte me Lufti Hazirin dhe Besian Mustafën, ndërsa u zgjodh kryetar i LDK pasi mori 190 vota nga 329 delegatë që morën pjesë në votim.
Sakaq në reagimin si kryetari i ri i LDK-së, Lumir Abdixhiku, ka thënë se rikthimi i kësaj partie është çështje kohe.
“Idetë e LDK-së i qëndrojnë kohës. Janë fundamenti jo vetëm i organizimit tonë partiak, por edhe shtylla themeltare të shtetit të Kosovës. Janë ide të nisura nga presidenti historik Ibrahim Rugova. Janë ide të kultivuara nga dy kryetarët paraprakë – Fatmir Sejdiu dhe Isa Mustafa. Janë ide të Lidhjes Demokratike të Kosovës. Këto ide bëjnë që sot dhe nesër dhe gjithherë burra dhe gra të këtij vendi të rreshtohen në familjen tonë politike. Jo sepse kanë interesa përfitimi, jo sepse kanë ndërlidhje të përjetimit individual të kohës, por sepse janë bindje dhe bindja i mbijeton sfidave të kohës.
Unë kam gjetur bindjen dhe besimin në këtë shtëpi politike. Kam gjetur idenë e ruajtur dhe të kultivuar me sakrificë të mundit dhe sakrificë të jetës. Kam gjetur themeluesit e shtetit të Kosovës, ideologët të kohërave më të rënda, bashkëmendimtarët e sotëm dhe potencialet e të ardhmes. Kjo shtëpi njëtrajtësisht më ka hapur dyert siç do t’ia hapë të tjerëve, shumë të tjerëve, që do të vijnë më pas – gra e burra, veprimtarë e veprimtare do të bartin pishtarin e lidhjes tonë gjatë dekadave të ardhshme. Ky relacion, kjo ndjenjë dhe ky besim e bën LDK-në të madhe. Numrat mbesin të përkohshëm, përpjekja jonë mbetet e përhershme. Prandaj, rikthimi jonë është çështje kohe.
Sot duhet të veprojmë, të bashkohemi rreth njëri-tjetrit dhe të hapemi për të tjerët. LDK-ja s’ka njerëz për të humbur, por s’ka as njerëz mjaftueshëm për të ecur përpara”, tha Lumir Abdixhiku./Opinion.al
