Ministrja e Shëndetësisë, Ogerta Manastirliu është shprehur ditën e sotme se janë kryer 900 mijë vaksinime ndërsa plani i kombinuar i vaksinimit është duke vazhduar me institucionet kritike, të cilat kanë kontakte direkte me qytetarët.
“Kemi kryer më shumë se 900 mijë vaksinime. Ritmi është goxha i mirë, por kemi mundësi akoma më shumë për të rritur këtë ritëm, në mënyrë që të arrijmë një mbulesë vaksinale sa më të lartë. Plani i kombinuar i vaksinimit është duke vazhduar edhe me institucionet kritike si OSHEE, të transportit, ujësjellësit si dhe institucione të cilat kanë kontakte direkte me qytetarët, siç janë bashkitë, siç është qendra e shërbimeve ADISA dhe institucione të tjera të cilat janë përfshirë në planin tonë të vaksinimit”, tha Manastirliu.
Ministrja e Shëndetësisë bëri apel për vigjilencë dhe theksoi se do të intensifikohet programi i vaksinimit.
“Pavarësisht se jemi në një situatë shumë të kontrolluar të epidemisë në vend, kjo nuk do të thotë se duhet të ulim vigjilencën, e aq më pak, ritmin e vaksinimit”, theksoi Manastirliu.
Prej fillimit të vaksinimit janë kryer në total 901,429 doza të vaksinës ndaj COVID-19. Prej tyre 375,629 qytetarë i kanë marrë të dyja dozat e vaksinës anti-COVID. Aktualisht është hapur fasha e vaksinimit për qytetarët +50 vjeç, ndërsa vijon vaksinimi i kombinuar edhe me grupet e riskut.
Procesi i vaksinimit po kryhet sipas të gjithë parametrave të sigurisë dhe cilësisë nga ekipe të trajnuar vaksinatorësh në të gjithë vendin./Opinion.al
