Reforma Zgjedhore është kthyer papritur në çështjen më të diskutuar për Shqipërinë edhe në kancelaritë kryesore diplomatike europiane. Pas reagimeve të ambasadorëve në Tiranë, një i tillë ka ardhur edhe na Komisioner për Zgjerimin në Bruksel, Oliver Varhelyi.
Ai shkruan se ka patur një bisedë sot me kreun e opoztis Lulzim Basha. Varhelyi thotë se reforma duhet të përmbyllet pa vonesa dhe në përputhje me rekomandimet e Këshillit të Europës.
“Bisedova me Lulzim Bashën sot, duke mirëpritur rifillimin e punës ndër-partiake për Reformën Zgjedhore në Këshillin Politik. Thelbësore për Shqipërinë dhe rrugën e saj drejt BE është që kjo reformë e rëndësishme të përmbyllet pa vonesë të mëtejshme, në përputhje me rekomandimet e marsit Këshillit të Europës.”- shkruan ai në Twitter.
Kryetari i Partisë Demokratike, Lulzim Basha, falënderoi komisionierin europian për Fqinjësinë e Mirë dhe Zgjerimin Oliver Varhelyi, për mbështetjen ndaj Shqipërisë. “Theksova përpjekjet e Partisë Demokratike për të kontribuar në Reformën Zgjedhore. Nënvijëzova se vullneti politik është vendimtar në përmbylljen e saj dhe për të siguruar zgjedhje demokratike, të çliruara nga blerja e votës dhe ndikimi i krimit të organizuar”, shkroi Basha në Twitter pas takimit.
Këshilli i Europës kërkoi në mars përmbylljen e Reformës Zgjedhore duke adresuar propozimet e OSBE/ODIHR. Kujtojmë se Këshilli ka qenë kritik kryesisht me propozimet e palëve sa i përket financimit të partive gjatë fushatave. Në një dokument prej 50 faqesh, Këshilli Europës ka kritikuar si komisionin e reformës ashtu edhe opozitën e bashkuar, sa i përket financimit të fushatave zgjedhore. Komisionit të Posaçëm, Këshilli i Europës i vë në dukje se drafti nuk përcakton shpenzimet e fushatave dhe parashikime problematike në përdorimin e burimeve publike. /Opinion.al
