Është ndërprerë takimi për Reformën Zgjedhore mes ambasadorëve të SHBA, BE dhe Britanisë së Madhe, me përfaqësuesit e palëve politike.
Mësohet se fillimisht nga mbledhja në rezidencën amerikane ka dalë përfaqësuesi i PS, Damian Gjiknuri, ndërsa më pas kanë dalë edhe përfaqësuesit e tjerë.
Gjiknuri pasi doli nga takimi me ambasadorët është parë me disa dosje në duar, ku mendohet të jetë konsensusi për Reformën Zgjedhore. Bëhet e ditur se pas takimit, Gjiknuri ka shkuar për të takuar kryeministrin Edi Rama.
Nga ana tjetër edhe përfaqësuesi i PD, Oerd Bylykbashi së bashku me përfaqësuesin e LSI, Petrit Vasili kanë shkuar në selinë e PD-së për tu konsultuar me kreun e opozitës, Lulzim Basha. Ndërkohë në rezidencë pak më gjatë qëndruan ambasadorët së bashku me Rudina Hajdarin, e cila doli e fundit.
Pas disa ditësh negociata, dy janë pikat ku palët ndahen. E para lidhet me identifikimin biometrik. Opozita kërkon aplikimin e tij në të gjithë vendin, kurse maxhoranca aplikimin në vetëm 10% sipas udhëzimeve të OSBE-ODIHR.
Pika e dytë lidhet me depolitizimin e administratës zgjedhore, por këtu duket se palët janë më afër krahasuar me të parën.
Gjatë mbrëmjes së djeshme, ambasadorja amerikane deklaroi se palët duhet të heqin dorë nga kushtet që dalin jashtë sugjerimeve të OSBE-ODIHR, ndërsa kërkoi arritjen e një marrëveshjeje sa më parë. Ky është edhe shkaku se përse takimet po mbahen tek rezidenca e saj dhe jo më tek Pallati i Kongreseve./ Opinion.al
