Ditën e sotme u mblodh komisioni i Reformës Zgjedhore, pas një periudhe shëkputje për shkak të pandemisë COVID-19
Pas përfundimit të mbledhjes, bashkëkryetari i Komisionit për Reformën Zgjedhore, Damian Gjiknuri deklaroi pas mbledhjes online se do i kërkojë zyrtarisht opozitës që Këshilli Politik të rifillojë javës tjetër dhe nëse nuk duan të vijnë është vendim i tyre.
Gjiknuri la të nënkuptohet se me apo pjesëmarrjen e opozitës Reforma Zgjedhore do të përmbyllet brenda 30 qershorit pasi mazhoranca do e miratojë bashkë me votat e opozitës parlamentare.
”Ishte një raportim për punën e Këshillit Politik. Kuvendi na ka lënë një afat 30 qershor dhe ky duhet të jetë afati i fundit pasi Reforma Zgjedhore është pikë themelore para uljes në konferencën ndërqeveritare. Opozita jashtëparlamentare ta shfrytëzojë këtë kohë në maj dhe Kuvendi në qershor të shqyrtojë për draftet. Nuk i kuptova disa deklarata të opozitës se a janë gati të vazhdojnë me dialogun apo këto draftet që propozojnë. Puna e atij Këshilli u ndërpre prej pandemisë. Ta rifillojmë aty ku e lamë. Dora jonë është e shtrirë, por mospjesëmarrja e tyre nuk mund të mbajë peng këtë proces. Dua të nxis dialogun, kam folur me diplomatë të jashtëm dhe nuk kam marrë përgjigje definitive. Është në interes të PD për të vazhduar dialogun. Kuvendi i ka votat, do përpiqemi dhe me opozitën parlamentare t’i bëjmë votat. Dëshira ime është që opozita të jetë pjesë integrale. Do ndërmarr hapa zyrtarë në lidhje me qëndrimin që ju dhashë, për rifillim të Këshillit Politik javën e ardhshëm. Këshilli Politik pa opozitën nuk ka kuptim, se është pjesë negociuese. Nëse s’duan të marrin pjesë t’ua thonë shqiptarëve dhe të vijojmë ne punën. Një nga propozimet është për procesin zgjedhor, pra partitë të heqin dorë nga administrimi i procesit zgjedhor që është ‘game changer’. Shpresoj të kemi mundësi të gjejmë kompromis. Kolegji Zgjedhor ka ardhur momenti se është çështje kohësh derisa të krijohet Apeli që do të jetë edhe institucioni që do trajtojë ankesat. Kemi rënë dakord që të përfshihet teknologjia, që KQZ të merret me votën e emigrantëve pra si do të bëhet votimi në distancë. Nuk i kemi lidhur duart vetes vetëm me ligj por organet të bëjnë rregullat. Qeveria tranzitore nuk është kusht i Reformës Zgjedhore, është çështje politike.”- tha Gjiknuri.
Ndërkohë, Bashkëkryetarja e Komisionit për Reformën Zgjedhore, Rudina Hajdari ka deklaruar po shqyrtohen draftet e opozitës, por jo të gjitha janë të realizueshme.
”Komisioni po sheh të gjitha propozimet që janë paraqitur nga palët, edhe nga opozita. Konsensusi është fjali kryesore. Nëse ka një Reformë Zgjedhore që do i japë fund mënyrës si procedohet me zgjedhjet atëhere ne duhet të merremi me të . Beteja ime për sistemin zgjedhor do të vazhdojë. Parlamenti sot nuk e gëzon sovranitetin e popullit. Jam gati që Shqipëria të ecë përpara dhe të futet në BE dhe Reforma Zgjedhore të mbarojë sa më parë. Kemi shansin të anëtarësohemi në BE dhe pse të ngelet peng Reforma Zgjedhore. Të lëmë interesat e ngushtë politike por të shohim interesat e shqiptarëve.”– tha Hajdari./ Opinion.al
