Këtë të markuar është mbajtur takimi i radhës për Reformën zgjedhore, ku ishin të pranishëm përfaqësuesit politik, ekspertët e OSBE/ ODIRH dhe ekspertët e Reformës.
Pas përfundimit të mbledhjes, përfaqësuesi i PD Oerd Bylykbashi për Reformën Zgjedhore, ka zbuluar propozimet e PD lidhur me krimin zgjedhor ku ka kërkuar hetimin e krimit dhe korrupsionit zgjedhor nga SPAK dhe goditja e tij nga institucionet më të larta të drejtësisë.
Bylykbashi tha se janë tre paketa ku përfshihen rritja e rolit të Policisë së Shtetit dhe asaj Gjyqësore, mbrojtja e denoncuesit të krimeve zgjedhore .
”Ky ishte takimi i dytë që patëm si katër përfaqësuesit e tryzës. Ishin dhe ekspertët e ODIHR. Opozita sot bëri propozimet lidhur me instrumentat që do të ndajnë politikën nga krimi. Janë tre paketa. Është roli i Policisë së Shtetit. Futja e një numri instrumentesh me mbajtjen e subjekteve që denoncojnë krimet zgjedhore, propozime lidhur me rolin e prokurorisë në goditjen e krimit zgjedhor dhe futja e këtij të fundit në kompetencat e SPAK, se në të shkuarën është lënë jashtë. Krimi i korrupsionit zgjedhor duhet të goditet nga strukturat më të larta të drejtësisë. Bashkë me ekspertizën e ODIR besojmë që do ecim me shumë shpejtësi. Paketa që do e keni në dispozicion ka të bëjë me garantimin e rregullave për të gjithë subjektet zgjedhore. Paketën do e keni në dispozicion dhe trajton të gjitha ato çështje që garantojnë rregullat për fushë të barabartë për zgjedhjet. Qeveria tranzitore është çështje publike e përmendur nga kryetari i opozitës dhe tryezat e tjera opozitare.”- tha Bylykbashi.
Ndërkohë, përfaqësuesi i mazhorancës Damian Gjiknuri tha se palët janë në frymën e bashkëpunimit. Duke u ndalur tek propozimet e PD-së, Gjiknuri tha se do të diskutohet në tryezë të gjithë pikat një e nga një, por jo për kërkesa politike, si qeveri teknike.
“Patëm disa propozime nga PD, edhe për kuotat gjinore dhe disa problematikave që duan të përfshihen në legjislacion, rolin e Policisë, është një dokument pune. Jemi në frymën për të gjetur bashkëpunimin, dhe jo të kërkojmë çdo lloj kërkese të natyrës politike që nuk përbën sens. Këto janë gjëra që duhet t’i shikojmë. Korrupsioni zgjedhor është një vepër penale, do e rishikojmë”, tha Gjiknuri.
Nga ana tjetër, deputetja e opozitës së parlamentare, Rudina Hajdari ka deklaruar se në tryezën e Reformës Zgjedhore, eksperti i tyre do të përqendrohet në ndryshimin e sistemit zgjedhor.
Duke u ndalur te propozimet e sjella nga PD-ja, Hajdari tha se një pjesë e tyre kishte natyrë politike, për të cilat sqaroi se do të gjendet një e mesme në përputhje me rekomandimet e OSBE-ODIHR. Në mbledhje nuk u ra dakord për asgjë konkrete.
“Në përgjithësi ramë dakord dhe treguam vullnetin për punët e javës në vijim. Ishim me ekspertë nga të gjitha fushat. Eksperti jonë, do merret me ndryshimin e sistemit. Kishte edhe propozime të tjera që erdhën nga PD-ja, por vijnë të një natyre politike. Perfeksioni nuk arrihet, por do gjendet konsensusi, që të zbatohen rekomandimet e OSBE-ODIHR. Pika të rëndësishme që të jenë në plan afatgjatë. Nuk u ra dakord për asgjë, por pati një vullnet të mirë për t’i akorduar ekspertët me njëra-tjetrin dhe si dhe funksionojnë në ditët ne vijim. Propozimet do ishte mirë t’i kishim marrë më herët, që takimet të jenë sa më produktive. Që t’i njohim paraprakisht dhe më pas t’i diskutojmë. Metodologjia e tanishme nuk është shumë e qartë, duke qenë se duhet t’i plotësojmë afatet, duhet të punojmë shumë intensivisht. Mendoj se do ketë vullnet dhe kërkohet një punë shumë intesive”, tha Hajdari. / Opinion.al
