Kryetari i Lëvizjes Socialiste për Integrim, Ilir Meta ka zhvilluar një takim me strukturat e partisë në Korçë për zgjedhjet për kryetar të LSI që do të mbahen më 6 nëntor.
Gjatë takimit të tij në Korçë, Meta theksoi se zgjedhjet janë të rëndësishme për të ardhmen e LSI-së.
Gjatë bashkëbisedimit, Meta e cilësoi të rëndësishme garën për të ardhmen e LSI-së, por edhe si një demonstrim i përgjegjshmërisë për të ardhmen e vendit.
“Besoj që kemi të bëjmë me një garë të rëndësishme sepse kjo është gara për të ardhmen, nuk është thjesht gara për kryetarin. Pra është gara për të ardhmen e LSI-së, e cila njëkohësish është një demonstrim, i përgjegjshmërisë për të ardhmen e vendit. E ardhmja e LSI-së është shumë e rëndësishme që të reflektojmë mbi të gjitha arritjet që LSI-ja ka deri më sot, por njëkohësisht edhe t’i përgjigjet sfidave të mëdha që kërkon drejtimi dhe menaxhimi i një force politike që sot është shumë herë më e madhe se sa vite më parë”, tha Meta.
Ilir Meta u shpreh se momenti i zgjedhjeve në LSI në këto 2-3 muaj është i rëndësishëm edhe për të rishikuar të gjithë organizimin, veprimtarinë, për të parë edhe programin politik dhe për të reflektuar edhe për shumë sfida me të cilat është ndeshur qeverisja dhe me shumë shqetësime prej të cilave dëgjohen nga qytetarët.
Duke nënvizuar se konfliktualiteti politik ka qenë e vetmja normë e politikës shqiptare për një kohë të gjatë, Meta tha se konfliktualiteti ndan artificialisht shoqërinë.
Në këtë takim, Meta shoqërohej nga Ministrja për Integrimin znj. Klajda Gjosha, Ministri i Bujqësisë, Zhvillimit Rural dhe Administrimit të Ujërave, Edmond Panariti, Nënkryetari i LSI-së, Endrit Braimllari dhe deputeti i qarkut të Korçës, Piro Kapurani.
