E ndërsa disa orë na ndajnë nga nisja e procesit të votimit në mbarë vendin për zgjedhjen e qeverisë së re, SPAK-u dhe agjentë të BKH-së kanë zbarkuar në Vlorë.
Gazetarja e Klan News, Glidona Daci, raporton se në qarkun e Vlorës ka mbërritur Prokurori i Posaçëm Bledar Maksuti, ndërsa ditën e neserme do të jetë prezente dhe Prokurorja e Posaçme Elida Kaçkini. Ata, së bashku me agjentët e Byrosë Kombëtare të Hetimit do të ndjekin nga afër të gjithë procesin e votimit dhe të numërimit të votave.
Sipas informacioneve, deri më tani nuk janë konstatuar parregullsi nga ana e prokurorëve të Strukturës së Posaçme Kundër Korrupsionit dhe Krimit të Organizuar, teksa theksojmë se Prokuroria e Përgjithshme e Sarandës ka regjistruar 2 procedime penale, ndërsa organi i akuzës së Vlorës 1 procedim penal.
Ndërkohë agjentët e BKH-së janë shpërndarë në të gjitha bashkitë e qarkut Vlorë.
Kujtojmë se SPAK dhe KQZ po bashkëpunojnë për parandalimin dhe hetimin e krimeze zgjedhore të mundshme, duke pasur në dispozicioni 16 zyra në të gjitha qarqet e vendit për të adresuar shqetësimet e qytetarëve sa i përket këtyre veprave penale. SPAK ka shpërndarë në terren 16 prokurorë, 3 prej të cilëve në Tiranë, 3 në Vlorë, 2 në Fier dhe nga 1 në 9 qarqet e tjera.
