Kryeministri i Kroacisë, Andrej Plenkoviç dhe kryeministri i Spanjës, Pedro Sanchez, kanë uruar kreun e qeverisë shqiptare Edi Rama për fitoren e Partisë Socialiste në zgjedhjet parlamentare të 11 Majit.
Përmes një urimi në rrjetet sociale, Plenkoviç shkruan se mezi pret të marrë pjesë të premten në Samitin që do të zhvillohet në Tiranë.
“Urime Kryeministrit për fitoren në zgjedhje! Pres me padurim forcimin e mëtejshëm të marrëdhënieve dypalëshe dhe vazhdimin e bashkëpunimit brenda NATO-s dhe forumeve të tjera ndërkombëtare. Gjithashtu, mezi pres të marr pjesë në samitin e KPE-së në Tiranë të premten”, shkroi Plenkoviç.
Ndërkohë, kryeministri spanjoll Pedro Sánchez u shpreh se fitorja tregon mbështetjen që shqiptarët japin për përpjekjet e vendit për anëtarësimin e vendit në BE.
“Urime, Edi Rama, për fitoren bindëse të Partisë Socialiste në zgjedhje. Shqiptarët mbështesin në masë dërmuese përpjekjet për anëtarësimin e Shqipërisë në Bashkimin Evropian. Përgëzime”, shkroi Sanchez.
Këto mesazhe vijnë pas votimeve të së dielës ku PS-ja e Edi Rama udhëheq garën dhe pritet të marrë 83 mandate sipas të dhënave të deritanishme.
