Avantazhi i Biden në Pensilvani vijon të rritet. Sipas projeksioneve të BBC, Biden tani po kryeson Trump me 6,817 vota.
Pak më shumë se një orë më parë, Biden po kryesonte me 5,587 vota.
Avantazhi i Biden pritet të vazhdojë të rritet, pasi votat që numërohen tani janë të dërguara me postë. Trump në mënyrë aktive ka dekurajuar mbështetësit e tij nga votimi me postë. Biden u tha mbështetësve të tij ta bënin këtë, në mënyrë që të ndihmonin në parandalimin e përhapjes së koronavirusit.
Senatori Republikan i Pensilvanisë Pat Toomey është midis disa kritikëve nga partia e presidentit të cilët po diskutojnë detaje nga konferenca e tij e shtypit dje në Shtëpinë e Bardhë.
“Unë pashë fjalimin e presidentit mbrëmë dhe ishte shumë i vështirë për t’u parë,” i tha ai NBC sot më herët.
“Pretendimet e presidentit për mashtrim në shkallë të gjerë dhe vjedhje të zgjedhjeve thjesht nuk janë të vërtetuara. Unë nuk jam në dijeni të ndonjë shkeljeje këtu.”
“Parregullësi ka në çdo zgjedhje por ato janë zakonisht shumë të vogla dhe përfshijnë vetëm një grusht votash.”
Toomey tha gjithashtu se nuk e kishte idenë se sa kohë do të duhej që votat të numëroheshin plotësisht në Pensilvani, një shtet i cili pritet të përcaktojë në njëfarë mënyre fituesin e zgjedhjeve në SHBA.
“Do të marrë kohën që duhet,” tha ai, duke shtuar se votat e mbetura ka të ngjarë të jenë për demokratët. /Opinion.al
