“Të bëhen sa më shpejt zgjedhjet në parti se kanë kaluar afatet”.
Këtë porosi u dha Rama sot socialistëve në mbledhjen e Kryesisë së partisë. Por për cilat zgjedhje e ka fjalën? Vetëm për kryetarët në rrethe apo grup-seksionet pasi për pozicionin e tij si kryetar partie nuk ka më zgjedhje nga baza.
Statusi që u shpërnda të shtunën në Asamble tregon qartë se Kryetari i partisë nuk ndryshon për sa kohë ka fituar zgjedhjet e pergjithshme parlamentare. Në pikën 3 të nenit 40 të statutit, jepen kushtet kur ndërpritet mandati katërvjeçar i kryetarit të partisë:
“Mandati i kryetarit të partisë është 4 vjet. Mandati i tij ndërpritet para kohe kur: a. Jep dorëheqjen; b. Partia humbet vendin e parë në zgjedhjet e përgjithshme; c. Humbet në mocionin e mosbesimit të zhvilluar për të, me kërkesën e 1/3 së anëtarëve të partisë”.
Jo vetem kaq, por Ramën pas largimit të Blushit nuk e rrezikon më askush. Tashmë në PS nuk ka asnjë kundërshtar të tij, apo person me ambicie që i rrezikon postin. Mjafton të kujtojmë betejen e dy viteve më parë kur Ben Blushi kërkoi me ngulm zgjedhjet në parti, por kjo mundësi nuk iu dha kurrsesi.
/R. Dedaj-Opinion.al
