Komisioni Zgjedhor i PD-së hapi sot listat e anëtarësisë së PD për votimet e së dielës, në prani të përfaqësuesve të kandidatëve për kryetar të PD.
Kryetari i Komisionit Zgjedhor Jemin Gjana bëri të ditur se degëve do t’u dërgohen listat e vulosura nesër me firmën e anëtarëve të Komisionit, përfshi dhe kandidatëve për kryetar të PD.
Në lista janë emrat e 75067 anëtarëve të PD, te cilët ndahen në 76 komisione votimi.
“Në pesë degë që kanë nga dy komisione bëhet një ndarje afërsisht e barabartë e numrit të anëtarëve. Kemi përgatitur zarfat për secilin prej komisioneve. Janë 76 zarfa në të cilat do të fusim listat e votimit të 76 komisioneve të votimit. Do t’i mbyllim, do t’i vulosim, dhe do t’i firmosim, secili, Kryetari dhe Sekretari i komisionit, detyrimisht dhe secili prej kolegëve anëtarë dhe përfaqësues të kandidatëve të këtij Komisioni, firmën mbi këto zarfe tek pjesa që mbyllet.
Zarfat, bashkë me materialet e tjera zgjedhore, do të shpërndahen nesër dhe do të hapen në prani të Komisionit, në momentin që fillon procesi i votimit. Pra do të hapen në orën 08:00 të ditës së diel. Kryetarët e Komisioneve e kanë marrë këtë porosi të prerë që zarfat nuk mund të hapen nga askush, zarfat do të hapen vetëm nëpërmjet Komisionit dhe do të përdoren në tavolinën e Komisionit për procesin e votimit. Shpresoj mos ndodhë, po meqë ka pasur pyetje, nëse na rezulton se një zarf i fletëve të votimit është i prishur, i dëmtuar apo i hapur, do pezullojmë në degën përkatëse procesin derisa të pajisim me setin jetër të listës së votuesve. S’besoj të ndodhë, të ketë kaq njerëz delikuentë, do fillojmë të procedojmë. Mund të qëndrojmë gjatë gjithë kohës, edhe për efekt të vulosjes e firmosjes.
Nuk e di sa kohë ha printimi dhe shkarkimi i setit të listave të një dege, ose të një komisioni, por janë 76, nga 5 minuta kohë të na hajë, është kohë e gjatë .’’- tha Gjana./Opinion.al
