Votimi për zgjedhjet e parakohshme parlamentare të Kosovës po zhvillohet sot që prej orës 07:00. Procesi përgjithësisht ka qenë i qetë dhe po vijon rregullisht.
Kryetarët e partive kryesore dhe kandidatët për kryeministra janë paraqitur në qendrat e votimit.
Kandidati për kryeministër i Nismës, Fatmir Limaj pasi votoi theksoi se vota do të ndryshojë perspektivën e vendit.
“Sot shfrytëzuam një mundësi të jashtëzakonshme që ka çdo qytetar. Pres që vota sot do ti japë perspektivë dhe mundësi të jashtëzakonshme që vendi të bëjë hapat e duhur”, tha Limaj për mediat.
Pas kandidates së LDK Vjosa Osmani, votoi dhe kryetari i partisë, Isa Mustafa.
Pas votimit ai ka dhënë një prononcim për media, ku ka theksuar se sot qytetarët vendosin për fatin dhe qeverisjen e tyre.
“Sot konsideroj se është një ditë tepër e rëndësishme për Kosovën. Qytetarët sot vendosin për fatin dhe qeverisjen e tyre. Kam besim të qytetarët, kam besim se Kosova do të kthehet në binarë. Unë do t’i ftoja sot qytetarët që të marrin pjesë në votim në mënyrë që të shprehet vullneti i tyre. Kam vërejtur se gjatë fushatës ka pasur njerëz më shumë prezent dhe me këtë konsideroj se do të kemi më shumë votues. Shpresoj që do të dalin më shumë sesa në herët e kaluara. Nuk kam vërejtur ndonjë parregullsi të madhe. Është me rëndësi të kemi një proces transparent dhe ai që të fitojë të fitojë me meritë” tha Mustafa.
Ka votuar gjithashtu edhe Aleati i Ramush Haradinajt në koalicion, Shpend Ahmeti. Kryetar i Komunës së Prishtinës dhe njëkohësisht kryetari i PSD-së tha se e ka kryer obligimin e tij si qytetar.
“Sapo kreva obligimin tim si qytetarë. Unë i ftoj të gjithë qytetarët të dalin të votojnë, kemi thënë gjithmonë 5 minuta kohë kanë rëndësi të madhe. Deri më tani nuk kemi raportuar për ndonjë parregullsi shpresoj që kjo ditë të shkojë ashtu siç i ka hije, një ditë demokratike”, ka thënë Ahmeti. /Opinion.al
