Aktualitet

Zgjedhjet në Kosovë, Rama:Uroj një kapitull të ri me qeveri të qëndrueshme


Bëhu pjesë e Grupit Zyrtar të Opinion.al
>> KËTU <<
               Publikuar në : 12:12 - 15/02/21 |
Doriana Çepunaj

Kryeministri Edi Rama ka uruar fituesin e zgjedhjeve të Kosovës, Lëvizjen Vetëvendosje dhe të gjithë forcat e tjera politike pas votimeve të 14 Shkurtit.

Në një postim në Twitter, Rama shkruan: “Përshëndetje të gjitha forcave politike në Kosovë dhe posaçërisht fituesve të qartë të zgjedhjeve, LVV, me urimin që vullneti i popullit të Kosovës të mishërohet në një kapitull të ri për Kosovën, me qeveri të qëndrueshme, dialog konstruktiv ndërpartiak, zhvillim ekonomik dhe social”, shkruan Rama.

Më herët edhe Presidenti Ilir Meta, dhe kryedemokrati, Lulzim Basha ka uruar qytetarët e Kosovës dhe klasën politike  për standartet e arritura në zgjedhjet e parakohshme të 14 shkurtit.

“Urime të gjithë qytetarëve dhe klasës politike të Kosovës për shembullin e shkëlqyer të besimit te demokracia dhe vota e lirë, si dhe për standardet e suksesshme të arritura në zgjedhjet e djeshme parlamentare. E përshëndes pjesëmarrjen e lartë të qytetarëve në votime, të cilët sfiduan kushtet e vështira atmosferike dhe pandeminë COVID-19, për të marrë në dorë fatet dhe për të vendosur të ardhmen e tyre. Kosova hapi një faqe të re në rrugëtimin e saj europian dhe konsolidimit të shtetit demokratik. Urojmë, që institucionet e reja, që do të formohen përmes bashkëpunimit, të udhëheqin me sukses shtetin e Kosovës për të fituar sfidat e të ardhmes”, shkruan Meta në Facebook.

Basha në një postimi në rrjetet sociale tha se është i lumtur që do të bashkëpunojë me qeverinë e re të Kosovës në proceset e integrimit si dhe në zhvillimin ekonomik të dy vendeve.

“Urime VV, Albin Kurtit dhe Vjosa Osmanit për fitoren e zgjedhjeve. Kosova ka sfida të mëdha përpara. Jam i bindur se partia fituese e zgjedhjeve dhe partitë e tjera do të arrijnë ti adresojnë dhe zgjidhin ato në të mirë të qytetarëve të Kosovës. Do të jem i lumtur të bashkëpunoj ngushtësisht me qeverinë e re të Kosovës, si sa i përket proceseve të integrimit euroatlantik dhe vijimit të njohjeve ndërkombëtare, ashtu dhe për zhvillimin ekonomik të dy vendeve tona. Përgëzime nga zemra qytetarëve të Kosovës, institucioneve dhe partive politike për një proces zgjedhor shembullor me standarde europiane, model demokracie për mbarë rajonin”./Opinion.al

 

 

 

Pas