Kryeministri Edi Rama është në Madrid të premten ku mori pjesë në Kongresin Botëror të Ligjit, i cili në vitin 2027 është parashikuar të mbahet në Shqipëri. E gjatë vizitës së tij në kryeqytetin e Spanjës nuk ka munguar interesi i mediave për ta intervistuar.
Për këtë arsye, kryeministri Rama është shprehur për El Mundo për një sërë çështjesh, që nga deklaratat e fundit të Trump për Gazën, marrëveshjen për emigrantët me Italinë, zgjedhjet në Kosovë, rajonin, integrimin në BE e deri te mbyllja e TikTok.
“Mendoj se plani duhet të qartësohet, të kuptohet dhe të harmonizohet me të gjithë aktorët e tjerë. Është ende herët”, tha Rama sa i përket deklaratave të Trump mbi Gazën.
Sa i përket marrëveshjes me Italinë për emigrantët, përsëriti se “ne thjesht përgjigjemi kur fqinji ynë na kërkon ndihmë”, por nuk i takon kryetarit të qeverisë shqiptare të përgjigjet për këtë çështje.
Sipas tij, Europa duhet të zbatojë një politikë të përbashkët emigracioni, por edhe të hapet ndaj emigracionit të ligjshëm.
Një pyetje interesante ishte edhe ajo për zgjedhjet në Kosovë. Pasi u shpreh se nuk ka asnjë preferencë për rezultatin që do të prodhojnë ato, Rama u shpreh se është mik dhe i respekton të gjithë.
“Unë jam një mik dhe i respektoj të gjithë. Qytetarëve të Kosovës u uroj gjithë të mirat për çfarëdo vendimi që do të marrin”, tha Rama.
Për negociatat theksoi se po shkojnë shumë mirë dhe shpreson që të realizohet plani që Shqipëria të jetë anëtare e BE-së deri në vitin 2030. Zgjedhjen e Donald Trump e sheh si një thirrje zgjimi për Europën që të ndryshojë dhe të jetë më realiste për sfidat që ka.
Sa i përket TikTok-ut u shpreh se do të mbyllet brenda pak ditësh dhe do të rihapet kur kompania të plotësojë të gjitha kërkesat për të adresuar shqetësimet e qeverisë shqiptare.
