Komisioni Qëndror i Zgjedhjeve në Kosovë ka njoftuar shifrat zyrtare të votimit deri në orën 11:00.
Sipas kryetares së KQZ-së, Valdete Daka, deri në orën 11:00 në Kosovë kanë votuar 174 mijë e 669 votues ose rreth 9.64 për qind.
Të drejtën për të votuar në zgjedhje e kanë 1 milion e 937 mijë e 868 votues.
“Ju njoftoj se duke u mbështetur në informacionet e Komisioneve Komunale të Zgjedhjeve, procesi i votimit është duke vijuar. Po ashtu, duke u mbështetur në të dhënat që kemi marrë nga rreth 94 përqind e vendvotimeve numri i qytetarëve me të drejtë votë që kanë votuar deri në orën 11:00 është 174 mijë e 669 votues, 9.64 për qind, nga 1 milion e 937 mijë e 868 votues” deklaroi Daka.
Ajo njoftoi gjithashtu se krahasuar me zgjedhjet e vititi 2017, ka një rritje të numrit të votuesve.
“Deri në të njëjtën kohë në zgjedhjet e parakohshme për Kuvendin e Kosovës të vitit 2017, kishin votuar 150 mijë e 244 votues, apo 8.45 përqind e votuesve. Të dhënat e detajuara për pjesëmarrjen e votuesve në çdo komunë dhe në çdo qendër votimi i gjeni në ueb faqen e KQZ-së të cilës mund t’i referoheni”, shtoi Daka.
Liderët e partive politike më të mëdhaja dhe kandidatët për kreun e qeverisë kanë bërë apel të vazhdueshëm ditën e sotme që qytetarët të marrin pjesë në votime. /Opinion.al
