Dje në Korenë e Veriut janë zhvilluar zgjedhjet për 687 anëtarët e Asamblesë Popullore, një institucion që kryen funksionin e Parlamentit. Sigurisht që nuk kanë qenë zgjedhje të vërteta dhe duhet thënë se zgjedhjet në Korenë e Veriut i ngjajnë shumë zgjedhjeve në Shqipëri gjatë periudhës së diktaturës.
Në fakt, Asambleja koreane nuk ka asnjë rëndësi në vendimmarrje dhe votuesit kanë vetëm një kandidat në fletën e votimit, të cilin mund ta aprovojnë apo të mos e aprovojnë. Kjo vetëm teorikisht, sepse praktikisht është e ndaluar ta refuzosh kandidatin, ose të abstenosh.
Këto janë “zgjedhjet” e dyta të këtij lloji, qëkur Kim Jong-un erdhi në pushtet në vitin 2011. Zakonisht kandidatët fitojnë me 100% të votave. Sipas agjencisë zyrtare të shtypit KCNA, në zgjedhjet e vitit 2014 kanë votuar 99,97% e atyre që kishin të drejtën për të votuar (pra të shtetasve mbi 17 vjeç). Pjesa e 0,03% ose ishin sëmurë, ose nuk ua lejonte puna të shkonin të votonin.
Megjithëse është një proces tërësisht i panevojshëm, eksperti i çështjeve të Koresë së Veriut Fyodor Tertitsky ka thënë për “The Guardian” se qytetarët duhet të shkojnë shumë herët për të votuar, “në shenjë besnikërie” ndaj pushtetit. Për këtë arsye, krijohen edhe radhë të gjata për të votuar. Gjithashtu, qytetarët duhet të vishen mirë, sepse zgjedhjet shihen si një lloj feste. Rrugën e Penianit mbushen me zbukurime dhe zhvillohen parada të ndryshme, për të nxitur qytetarët te votojmë. Jashtë qendrave të votimit shpesh herë shihen grupe muzikore dhe zakonisht ata që votojnë, kur dalin nisin të kërcejnë.
Natyrisht, edhe për këto zgjedhje, pritet një rezultat 100% aprovues, për një institucion krejtësisht pa asnjë kompetencë./Opinion.al
