“Likud”, partia e djathtë e kryeministrit izraelit Benjamin Netanyahu ka arritur të fitojë 29% të votave në zgjedhjet e përgjithshme që u mbajtën të martën dhe me shumë mundësi do të arrijë të formojë qeverinë.
Nëse kjo ndodh, për Netanyahun ky do të jetë mandati i pestë si kryeministër, i katërti radhazi pasi një mandat e ka kryer në vitet 1996-1999. Në zgjedhjet e mbajtura ditën e djeshme, edhe partia e qendrës e sfidantit kryesor të Netanyahut, ish-gjeneralit Benny Gantz ka arritur të marrë 29% të votave, por sipas analistëve “Likud” dhe partitë e tjera aleate kanë më shumë mundësi për të formuar një koalicion, që do t’i japë rreth 65 mandate në Parlamentin me 120 vende.
Në zgjedhjet e vitit 2015, “Likud” arriti të fitonte 23% të votave, të konvertuara në 30 mandate në parlament. Netanyahu ka komentuar rezultatet, duke folur për një “fitore të jashtëzakonshme”. Por gjatë natës, edhe Gantz ka paralajmëruar fitoren duke thënë: “Në zgjedhje ka humbës dhe fitues, ne jemi ata që kemi fituar”. /Opinion.al
