Greqia do të zhvillojë nesër zgjedhjet e përgjithshme të parakohshme. Prej një muaji partitë kanë zhvilluar fushatat e tyre dhe sot ato i kanë lënë vendin heshtjes elektorale. Dy partitë që pretendojnë të marrin shumicën e votave janë Syriza, e kryeministrit aktual Aleksis Tsipras dhe Demokracia e Re e drejtuar nga Kyriakos Mitsotakis. Zgjedhjet e parakohshme në Greqi erdhën si rezultat i pakënaqësive ndaj qeverisë lidhur me Marrëveshjen e Prespës dhe krizën ekonomike. Zgjedhjet e fundit të Parlamentit Europian, por edhe ato vendore, ishin paralajmëruesit e këtyre zgjedhjeve pasi koalicioni qeverisës pësoi një humbje të thellë kundër të djathtëve të Mitsotakis.
Ardhja në pushtet e Demokracisë së Re mund të ketë pasoja negative për Shqipërinë. Lideri i saj paralajmëroi gjatë fushatës elektorale vendosjen e vetos ndaj integrimit të Shqipërisë nëse këtu nuk zbatohen siç duhen të drejtat e minoritetit grek.
Në përmbyllje të fushatës, ai tha se kërkon një mandat për të bashkuar vendin me një plan real. “Mbrëmjen e 7 korrikut do të jem Kryeministër I Greqisë dhe I të gjithë grekëve”, tha Mitsotakis. Por pavarësisht sondazheve që e nxjerrin atë fitues me mbi 33% të votave ende nuk dihet nëse Demokracia e Re do të mund të qeverisë e vetme. Mitsotakis ka bërë me dije se nëse nuk arrin një maxhorancë të plotë, ai do të kërkojë zgjedhje të reja.
Nga ana tjetër Tsipras po shpreson që aleanca e tij me PASOK ti japë numrin e duhur të deputetëve për të qeverisur. I vetëdijshëm për humbjen e votave ai deklaroi “Ne po kërkojmë një mandat të plotë, jo një mundësi të dytë, por një shans të parë për të qeverisur me programin tonë, pa trojkën mbi kokën tonë”. /Opinion.al
