Deputeti i Partisë Demokratike dhe njëkohësisht kreu ende në detyrë i Forumit Rinor të PD, Belind Këlliçi ka thënë sot se zgjedhjet e shpallura nga kreu i PD, Lulzim Basha në FRPD kanë qenë kundër statutit të PD dhe ka theksuar se zgjedhjet e strukturave drejtuese të FRPD do të anonçohen sot nga organet e këtij forumi.
Në një intervistë në News24 , Këlliçi bëri me dije se nuk do të garojë më për kreun e FRPD.
“Në asnjë nen të statutit të PD nuk flitet për kompetencë të kreut të PD për të shpallur zgjedhjet në FRPD.Unë jam pro zgjedhjeve. Nuk ishte ky statut që është sot kur kreu i PD shpalli zgjedhjet e kaluara të FRPD. E kemi miratuar më 4 qershor 2020, ka qenë dhe zoti Basha në sallë.
Nuk ekziston ai proces, ne kemi procesin tonë që e anoncojmë sot. Sot i jam drejtuar sekretariatit të FRDP ku kam shprehur vullnetin për të mos garuar më dhe iu kam kërkuar të organizojnë zgjedhjet. FRPD është PD e pas 15-20 viteve”, tha Këlliçi.
