Partia Socialiste ka reaguar sot për dekretin e një dite më parë të Presidentit Bujar Nishani, që cakton datën 11 shtator si ditën e mbajtjes së zgjedhjeve për kryetar bashkie të Peshkopisë, Qarku Dibër.
Me anë të një deklarate për mediat, deputetja socialiste blerina Gjylameti tha se ky është një vendim i nxituar dhe personal i Presidentit, pasi vendimi Kushtetues nuk është zbardhur.
“Vendimi i presidentit është i nxituar dhe personal, pasi vendimi i Kushtetueses nuk është zbardhur. Kur vendimi nuk zbardhet, ende nuk ka hyrë në fuqi. Pas hyrjes në fuqi Presidenti mund të shpallë zgjedhjet. Dekreti i Presidentit në kundërshtim me ligjin dhe ndaj është i pavlefshëm. Presidenti të konstatojë pavlefshmërinë e aktit”, tha Gjylameti.
Dekreti i Presidentit erdhi pas vendimit të Gjykatës Kushtetuese, e cila hodhi poshtë kërkesën e ish-kryetarit Shukri Xhelili për rikthimin në detyrë.
Ish-kryebashkiaku Shukri Xhelili, i cili ndodhet në arrest me burg, u shkarkuar nga kjo detyrë pas publikimit të një video-skandali seksual, ku u shfaq duke i kërkuar favore seksuale një 18-vjeçareje në këmbim të një vendi pune. Menjëherë pas publikimit të videos, Këshilli i Ministrave vendosi shkarkimin e tij nga detyra si kryebashkiak.
