Kryetari i Partisë Demokratike Lulzim Basha ka reaguar edhe njëherë për zgjedhjet në Dibër, duke atakuar kryeministrin Rama si përgjegjës për manipulime të mundshme të zgjedhjeve lokale në këtë zonë. Nëpërmjet një statusi në fb Basha shkruan se “në vend që të verifikonte dhe të mbante qëndrim për krimin skandaloz të Drinit Gjecit që ju valëvit mësuesve largimin nga puna, nëse nuk votojnë kandidatin e qeverisë në zgjedhjet e 11 shtatorit, Edi Rama mori sot në mbrojtje horrin e tij që menaxhon arsimin në Dibër.
Ja statusi i plotë i Bashës në fb
Në vend që të verifikonte e të mbante qëndrim për krimin skandaloz të Drini Gjecit që ju valëvit mësuesve njoftimin e largimit nga puna, nëse nuk votojnë kandidatin e qeverisë në zgjedhjet e 11 shtatorit, Edi Rama mori sot në mbrojtje horrin e tij që menaxhon arsimin në Dibër.
Me këtë akt, ai konfirmoi publikisht se qëndron vetë pas kësaj skeme të dhunimit të votës, të përdorimit të pushtetit për të grabitur vullnetin e lirë, duke luajtur me bukën e arsimtarëve dhe fëmijëve të tyre.
Rama e legalizoi këtë krim përmes Luizës së tij të arsimit e cila prej 3 vitesh i ka kthyer drejtoritë arsimore në qendra korrupsioni ku paguhen mijëra euro për një vend pune dhe në motele ku trafikohen mësueset e reja per kënaqesinë e pushtave të rilindjes.
Shantazhi që u bëhet mësuesve të Dibrës do të marrë përgjigjen e merituar. Kërcënimet e horrave të Ramës nuk do ta zhbëjnë dot vullnetin e dibranëve. I bëj thirrje Prokurorisë të nisë menjëherë hetimin për krimin zgjedhor të kërcënimit për votën.
Ju bëj thirrje arsimtarëve dhe të gjithë të punësuarve të tjerë në Bashkinë e Dibrës të mos bien pre e presioneve dhe kërcënimeve dhe i siguroj se çdo zuzar që guxon ti shantazhojë do të përballet me ligjin.
Ndërsa Edi Rama dhe shpura e horrave që ka dislokuar në Dibër për të trembur dhe dhunuar dibranët duhet ta dijnë se po luajnë me zjarrin.
Zemërata e sovranit të dhunuar, vjedhur dhe poshtëruar do të përvëlojë çdo rryshfet, çdo kërcënim, çdo bandit e mercenar bashkë me shefin e tyre.
