Zyrtarizohen emrat e disa prej kandidatëve të PS-së për zgjedhjet lokale. Teksa është zbardhur axhenda e kongresit të PS-së që zhvillohet në 23 mars në Pallatin e Kongreseve, aty theksohet se fjalën do të mbajnë këta kandidatë për t’i kërkuar qytetarëve një mandat 4 vjeçar.
Armando Subashi në Fier, Sotirqa Filo në Korçë, Pjerin Ndreu në Lezhë, Dritan Leli në Vlorë, Majlinda Bufi në Roskovec dhe Gledian Llatja në Elbasan.
Siç duket deputeti socialist Ndreu heq dorë nga mandati i deputetit dhe kërkon të drejtojë bashkinë e Lezhës, ndërsa merr fund dhe cikli i Qazim Sejdiut në Elbasan.
Më pas, kryeministri Rama me kryebashkiakun e Tiranës do të spostohen drejt sheshit “Nënë Tereza” për aktivitetin “Bashkia që Duam” ku do të prezantohet zyrtarisht kandidatura e Erion Veliajt.
Ky i fundit prej ditësh bën thirrje që njerëzit t’i bashkohen këtij aktiviteti për të treguar dhe forcën e numrave.
Fjalën hapëse në Kongres do e ketë Sekretari i Përgjithshëm, Taulant Balla. Do të diskutohet edhe për Reformën Zgjedhore dhe për Votën e Emigrantëve. Kryeministri Edi Rama pritet që të flasë në përfundim të prezantimit të kandidatëve për kryebashkiakë. Në këtë Kongres është i ftuar edhe lideri historik i PS, Fatos Nano, i cili sipas Alfred Pezës ka pranuar dhe do të jetë i pranishëm në këtë event./ Opinion.al
