Astrit Patozi ka dhënë deklaratën e parë si koordinator i partisë Bindja Demokratike. Ai ka thënë se kjo forcë politike është e vendosur për të marrë pjesë në zgjedhjet e 30 qershorit. Patozi ka deklaruar se Bindja Demokratike do të ketë kandidat në çdo bashki, përveç atyre ku do të garojnë kandidatë të pavarur ose kryetarë bashkish të djathtë.
“Bindja Demokratike është e vendosur që në zgjedhjet e 30 Qershorit të bëjë betejën e saj frontale në të gjithë territorin e vendit ndaj duke u përballur me të gjithë kandidatët e Partisë Socialiste pa asnjë dallim. Në këtë sfidë do kërkojmë mbështetjen e çdo qytetari që refuzon këtë mazhorancë dhe mendon se Shqipëria po qeveriset keq e më keq. Bindja Demokratike ka objektivin e vet kryesor që në këto zgjedhje të përfaqësohet nga kandidatët e saj në çdo bashki të Shqipërisë. Nga ky rregull i përgjithshëm do të përjashtohen vetëm këto dy raste. Kandidatët e pavarur dhe ish-kryetarët e bashkive të djathta”, ka thënë Patozi.
Patozi gjithashtu tha se vlerëson çdo kandidat të pavarur që është regjistruar si kundërshtar i qeverisë, duke e konsideruar si aleat në këtë kauzë.
“Ne zotohemi se nuk do nxjerrim kandidatë për kryetar në Bashkitë ku ata janë regjistruar, por do i mbështesim ata pavarësisht raportit që mund të kenë me BD. Arsyeja është një dhe e vetme që votat e kundërshtare të qeverisë të mos çahen dhe që të arrijmë qëllimin tonë, fitoren nga çdo kandidat i PS-së. Angazhohemi se do mbështesim dhe nuk rivalizojmë edhe kandidatë të mundshëm nga radhët e kryetarëve të bashkive të djathta që mund të vendosin të përballen me përfaqësuesit e qeverisë do i konsiderojmë si përfaqësuesit tanë sepse mendojmë që vetëm bashkimi i çdo force mund të sjellë rezultat fitues përballë kandidatëve të PS-së”, u shpreh Patozi./Opinion.al
