Kreu i Këshillit Kombëtar të PD, Edi Paloka, në një deklaratë për mediat foli për vendimet e marra në mbledhjen e Këshillit të PD, këtë të shtunë.
Në një deklaratë për mediat, Paloka bëri me dije se është miratuar rregullorja për mbajtjen e primareve brenda PD, e pas kësaj Berisha do të nisë negociatat me aleatët për mënyrën se si do të shkohet në zgjedhjet e ardhshme lokale.
“Menjëherë pas sot meqenëse ishte procesi i miratimit të rregullores në një farë mënyre “pengesë”, do të fillojnë kontaktet me aleatët me të cilët do të bashkërendohet edhe puna dhe gjithçka tjetër. Detajet si do të veprohet në rast se do të vendoset që aleatëve tu lihet një zonë e lirë, apo modalitetet e tjera, do të përcaktohen gjatë këtyre bisedimeve. Besoj që vetë kryetari i partisë demokratike do të jetë negociatori kryesor, pra zoti Berisha”, u shpreh ai.
Po ashtu Paloka tha se është vendosur që në primare të mund të marrin pjesë edhe simpatizantët.
“Ato që mund të konsiderohen risi nga primaret e fundit janë që në votime, në fakt e përcakton statut i PD, nuk do të marrin pjesë vetëm anëtarësia e Partisë Demokratike, por do të marrin pjesë edhe simpatizantët e PD-së, të cilët përcaktohen qartazi në statut se kush janë simpatizantët, si regjistrohen dhe të gjitha modalitetet e tjera që përcaktojnë figurën e simpatizantit. Simpatizantët kanë të drejtën e votimit në primare. Çështja tjetër që u diskutua ishte ajo e kandidimit të kryetarëve të degëve dhe pozicionit që ata duhet të mbajnë gjatë momentit kur kandidojnë në primare. Pati disa propozime, por në fund u miratua propozimi i grupit të punës dhe Kryesisë. Kryetarët e degëve që do të kandidojnë në primare gjatë kohës që kandidojnë në primare funksionet e tyre do t’i kryejë një nga nënkryetarët e partisë, pra e degës, siç e përcakton statuti i Pd. Gjatë primareve kryetarët nuk do ta ushtrojnë detyrën e tyre si kryetar, por atë do ta ushtrojë një nga nënkryetarët. Nëse fitojnë në primare dhe shpallen kandidatë atëherë statuti parashikon që nuk janë më në pozicionin e kryetarit të partisë, por kandidatë. Nëse nuk fitojnë në primare do ta mbajnë pozicionin e kryetarit të partisë”, u shpreh Paloka.
I pyetur nga gazetarët për protestat, ai tha: “Është një çështje që ishte në rëndin e ditës, u diskutua dhe u morën dhe vendimet e duhura që ju do t’i merrni vesh në momentin e përshtatshëm”.
