Gjykata Kushtetuese ka reaguar në lidhje me vendimin, për të dërguar çështjen e zgjedhjeve të 30 qershorit të 2019-ës në Komisionin e Venecias.
Në një reagim zyrtar, Gjykata Kushtetuese sqaron se kjo çështje është e një natyre unike dhe këshillimi me organe të specializuara u konsiderua i nevojshëm nga kjo Gjykatë.
Gjykata Kushtetuese, në deklaratën e saj të fundit për mediat, ka theksuar rëndësinë e respektimit të pakushtëzuar të vendimeve të saj dhe ka shprehur besimin se ushtrimi i veprimtarisë të kësaj Gjykate në një klimë besimi nga kushdo do t’i shërbente forcimit të autoritetit të saj si organ kushtetues i pavarur.
Gjykata konstaton se debati jokonstruktiv i ditëve të fundit jo vetëm që nuk i shërben kësaj klime besimi, por, përkundrazi, mund të perceptohet si përpjekje për ta përfshirë atë në debate me ngjyrime politike, të veshura nën petkun e diskurseve juridike për të paragjykuar vendimmarrjen e saj në lidhje me themelin e çështjes dhe si ndërhyrje në pavarësinë e saj./Opinion.al
