Gjatë votimeve të sotme u zgjodhën kryetaret e rinj të PD në një sërë rrethesh. Kështu në Mat, në garë, morën pjesë Alfred Ahmetcenaj, ish-kryetari i degës lokale dhe Arjan Lika, drejtori i SHA Ujësjellës-Kanalizime Mat.
Pas numërimit të votave, Arjan Lika rezultoi fitues me 171 vota, Ahmetcenaj mori 55, ndërsa 10 vota rezultuan te pavlefshme.
Lezhë – Zef Gjoka është kryetari i ri i Partisë Demokratike në Lezhë, i zgjedhur në votimet që u mbajtën sot. Gjoka ka fituar garën përballë kryetarit aktual, Paulin Marku.
Votuan 306 gjithsej anëtarë, prej te cilave Gjoka fitoi me 213 vota. Në përfundim të procesit zgjedhor, të dy kandidatët kanë shtrënguar duart me njëri-tjetrin, duke përcjellë një mesazh bashkimi.
Shkodër – Xhevdet Amulli është kryetari i ri Partisë Demokratike në Shkodër.
Në zgjedhjet e sotme, Amulli mori 243 vota, vetëm 2 më shumë se kandidati tjetër Ramiz Çobaj, i cili deri në këto momente drejtonte degën e PD-së në Shkodër.
Vlorë – Genc Deromemaj është kryetar i ri i Partisë Demokratike në Vlorë. 352 votues kanë qenë pjesë e votimit të sotëm në Vlorë. Nga 352, vetëm katër vota kanë dale të pavlefshme. Deromemaj ka marrë 12 vota më shume se sa kandidati tjetër, Gjergj Nika.
