Pas mesnate, kandidati për kryeministër nga koalicioni PDK-AAK-Nisma, Ramush Haradinaj, tha se “Kosova e ka kaluar sprovën me zgjedhjet e 11 qershorit dhe votuesit i kanë dhënë besimin këtij koalicioni”.
I kujdeshshëm në deklarim për rezultatin zgjedhor, u shfaq kryetari i LDK-së Isa Mustafa, duke thënë se partia e tij pret rezultatin përfundimtar.
Të entuziazmuar, siç thanë me rritjen, u shfaqën edhe udhëheqësit e Lëvizjes Vetëvendosje, të cilët thanë se në nivel partish, ata e konsiderojnë vetën “partia më e madhe në Kosovë”.
Nga 91 për qind e votave të numëruara, Koalicioni i PDK-AAK-Nisma, me kandidatin për kryeministër Ramush Haradinaj ka fituar 34.6 për qind të votave.
Në vendin e dytë është radhitur Lëvizja Vetëvendosje me 26.7 për qind të votave, ndërsa, Lidhja Demokratike e Kosovës, Aleanca Kosova e Re dhe Alternativa e treta me 25.8 për qind të votave. Nga partitë serbe, Lista Serbe ka fituar mbi 5 për qind të votave.
Lajmi për fitoren e Haradnajt është pasqyruar edhe në median ndërkombëtare. Gjigandi i informimit BBC shkruan sot: “Një ish-komandant rebel i kërkuar nga Serbia për krime lufte ka fituar zgjedhjet parlamentare në Kosovë, sipas rezultateve paraprake të KQZ-së”.
Më tej nga shkrimi i BBC veçohet: “Një fitore për Haradinajn, lider i Aleancës për Ardhmërinë e Kosovës, do të komplikojë marrëdhëniet me Serbinë, e cila ka lëshuar një urdhër-arresti ndërkombëtar kundër tij për krime lufte”.
