Vendimi për organizimin e zgjedhjeve në Forumin Rinor të Partisë Demokratike ka shkaktuar reagime brenda kësaj force. Është deputetja Albana Vokshi e cila përmes një publikimi në Facebook, e cilëson këtë veprim si arbitrar, ndërsa thekson se organizatat si LDGSH dhe FRPD organizohen dhe drejtohen në bazë të Statutit të tyre dhe as kryetari nuk mundet t’ua marr vendimarrjen.
“Partia Demokratike ka nevojë për demokraci, jo arbitraritet!
Statuti i Partisë është i qartë: vendim-marrja e brendshme nuk lihet në një dorë. Përkundrazi, ajo është e shpërndarë mes një sërë organesh dhe drejtuesve të ndryshëm. Organizatat Partnere të Partisë Demokratike, LDGSH dhe FRPD, janë forume që organizohen dhe drejtohen në bazë të Statutit të tyre. Askush, as Kryetari i PD, nuk ju merr dot vendimmarrjen. Asnjë organ, asnjë funksionar nuk mund të uzurpojë pushtetin që statuti ja njeh një forumi, organi apo funksionari tjetër”, shkruan Vokshi.
Duke e vënë theksin në situatën ku PD ndodhet aktualisht, deputetja shprehet se inati dhe hakmarrja nuk duhet të prevalojnë ndaj statutit.
“Veçanërisht në situata debati apo përplasjesh të brendshme, inati, hakmarrja, intrigat nuk duhet të prevalojnë ndaj statutit. Përkundër, Statuti është vendimtar dhe mbi të gjitha ceshtjet e mbi te gjithë. Pas 31 vjetësh, cdo demokrat është në mision, për t’u bashkuar për të ringritur partinë nëpërmjet fuqizimit të anëtarësisë, forcimit të demokracisë të brendshme, respektimit të fjalës dhe mendimit të lire”, përfundon Vokshi./Opinion.al
