Pas firmosje së koalicionit të majtë për zgjedhjet e 30 qershorit, Taulant Balla ka folur për mediat nga selia e Partisë Socialiste.
Balla ka përsëritur se zgjedhjet e 30 qershorit do të mbahen, ndërsa risolli në vëmendje edhe qëndrimet e Shteteve të Bashkuara të Amerikës dhe Bashkimit Europian për legjitimitetin e Parlamentit dhe zgjedhjet lokale.
Kreu i grupit parlamentar socialist ka thënë se PS e pranon dialogun, por jo negociatat në kurriz të Kushtetutës.
“Zgjedhjet e 30 qershorit do të zhvillohen, mandati i Kuvendit është legjitim. Dua të përsëris, ka qenë shumë i qartë qëndrimi i SHBA përmes z.Palmer kur ishte në Shqipëri apo edhe qëndrimi i BE-së, që nxit partitë të marrin pjesë në zgjedhje. Zgjedhjet do të zhvillohen në 30 qershor, janë të gjithëpranuara me këdo parti që marrin pjesë në zgjedhje. Kush tenton të pengojë zgjedhësit të shkojë në votim, dënimet shkojnë nga 5 deri në 8 vite burg. Në çdo rast, afatet zgjedhore janë kushtëzuese për këdo. Kush mendon se mund ta përdori Kushtetutën apo kodin zgjedhor si alibi për humbjen e radhës e ka shumë gabim. Nuk ka negociata me askënd mbi kurrizin e Kushtetutës. Sikurse bënë gabimin e paimagjinueshëm e dorëzimit të mandateve, tani PD dhe LSI duan t’u heqin shqiptarëve të drejtën për të votuar, kjo nuk ka për të ndodhur. Duhet të jetë e qartë për këdo, zgjedhjet janë të popullit. Partitë kanë për detyrë të marrin pjesë në zgjedhje”, ka thënë Taulant Balla nga selia e Partisë Socialiste./Opinion.al
