Ministri i Brendshëm Ervin Hoxha mori pjesë në një mbledhje me të gjithë Prefektët e Qarkut të Gjirokastër, në të cilën u diskutua për masat e marra për procesin zgjedhor të 11 majit dhe detaje që kanë të bëjnë me përgjegjësitë e strukturave të përfshira në këtë proces.
Pas mbledhjes, Hoxha tha për gazetarët se së bashku me Policinë e Shtetit do të jenë në gjendje për të ngritur infrastrukturën dhe planifikuar në mënyrë të rregullt zgjedhjet e 11 majit 2025.
“Sot në vijim të takimeve që neve kemi periodikisht me Prefektët e Qarkut, kemi bërë një takim në Gjirokastër ku kemi biseduar për të gjitha masat e marra dhe koordinimin për përgatitjen dhe ngritjen e infrastrukturës për zgjedhjet e 11 majit. Kemi diskutuar në detaje të gjitha përgjegjësitë që Prefektët e Qarqeve duhet të marrin në zbatim të ligjit si dhe kodit zgjedhor.
Aktualisht janë hartuar të gjithë planet e masave. Prefektët e qarqeve në bashkëpunim me bashkitë, Policinë e Shtetit do të jenë në gjendje për të ngritur infrastrukturën dhe planifikuar në mënyrë të rregullt zgjedhjet e 11 majit 2025.
Aktualisht kemi rreth 100 mijë shtetas shqiptarë të cilët janë regjistruar në platformën e KQZ për zgjedhjet e 11 majit”, tha Hoxha.
Ndërkohë Hoxha tha se shtetasit shqiptarë të cilëve u kishte përfunduar vlefshmëria e kartave të identitetit dhe pasaportave biometrike, do të kenë mundësi të votojnë për zgjedhjet e 11 majit deri në datën 31 maj 2025.
”Për sa i përket votës së diasporës, qeveria shqiptare miratoi p/vendimin ditën e mërkurë (të shkuar), ku të gjithë shtetasve shqiptarë të cilëve u kishte përfunduar vlefshmëria e kartave të identitetit dhe pasaportave biometrike, do të kenë mundësi të votojnë për zgjedhjet e 11 majit. Kjo vlefshmëri është zgjatur deri në datën 31 maj 2025”, shtoi Hoxha.
