Mbërrin baza materiale zgjedhore në Komisionin Zonal të Administrimit Zgjedhor (KZAZ) nr. 11 të Bashkisë Kukës.
Pas mbërritjes së materialeve zgjedhore, kryetari i KZAZ, Uran Cengu, bëri të ditur se gjithçka është gati për ditën e shtunë, kur do të nisë edhe shpërndarja e materialeve në 73 qendrat e votimit.
Gjithashtu Cengu informoi për organizimin e grupit të numërimit të votave. Qendra e Numërimit do të jetë e vendosur në palestrën e gjimnazit të qytetit, e cila ruhet nga forcat e Policisë. Në total, 44.535 shtetas në Bashkinë Kukës kanë të drejtë vote në këto zgjedhje, një rënie krahasuar me vitin 2023, kur ishin 45.855 votues.
Ulje ka edhe ne qendrat e votimit. Ne 11 maj do hapen 73 qendra votimi. Një me pak nga 2023 ku hapen 74. Kjo ulje është pasojë e rënies së numrit të banorëve në fshatin Kalis, ku janë larguar rreth 300 persona.
Në qytetin e Kukësit, të drejtë vote kanë 18.574 qytetarë. Ndërkohë, më 11 maj pritet të votojnë edhe 44 persona me aftësi të kufizuara dhe 27 të paraburgosur.
Edhe në KZAZ-të e Hasit dhe Tropojës kanë mbërritur materialet zgjedhore, përfshirë kutitë e votimit, fletët, pajisjet ndihmëse dhe sistemin monitorues me kamera e ekrane për të gjitha qendrat e votimit dhe numërimit.
