Ka përfunduar procesi i numërimit të votave nga Greqia për qarkun e Tiranës, pa prodhuar ndonjë ndryshim rezultati për kandidatët. Ndërkohë në një deklaratë për shtyp, kryekomisioneri Ilirjan Celibashi tha se në total kanë rezultuar 9 kuti të parregullta, ndërsa janë mbi 55 mijë vota të parregullta në rang kombëtar.
“Në rang vendi, 55 519 janë vota të pavlefshme. Nëse mbledhim numrin e votave të vlefshme me ato të pavlefshme, atëherë përputhet 100% me numrin e fletëve të gjetura në kuti. S’ka asnjë kontradiktë logjike. Kuti të parregullta janë vetëm 9 që kanë rezultuar nga procesi i vlerësimit, 7 janë shpallur të parregullta që në momentin e dorëzimit dhe 2 janë konsideruar të tilla pas marrjes së kutive në dorëzim. Janë 1666 vota të pavlefshme në kuti nga diaspora”, tha ai.
Më tej, duke u ndalur te konstatimi i parregullsive për votat e diasporës, tha se “disa votues nga jashtë nuk kanë dorëzuar Zarfin B, por vetëm zarfin A.”
Ndërkohë theksojmë se Partia Mundësia është e sigurt në 2 mandatet që ka fituar në Tiranë, pasi rezultatet nuk sollën ndonjë ndryshim. Tanimë është PD që rrezikon një mandat në qarkun e Lezhës.
