Kur na ndajnë pak orë nga publikimi i listave me emrat e kandidatëve për deputet në zgjedhjet e 11 Majit, në selinë blu po zhvillohet mbledhja e Kryesisë së Partisë Demokratike.
Në fjalën e tij, Sali Berisha përshkroi shkurtimisht kandidatët dhe u shpreh se koalicioni për ‘Shqipërinë Madhështore’ do të ketë listën më dinjitoze që është paraqitur ndonjëherë kjo parti
Kryedemokrati theksoi se pjesë e listët do të jenë specialistë të shquar, përfaqëues të inteligjencës shqiptare, përfaqësues të diasporës, të komuniteteve të ndryshme, gra të shquara dhe të rinj.
Pjesë nga fjala e Sali Berishës:
Koalicioni për ‘Shqipërinë Madhështore’ paraqitet para shqiptarëve me listën më dinjitoze që është paraqitur ndonjëherë kjo parti, me luftëtarë të vendosur të kauzave të drejta të kësaj partie, të cilët në 4 vite kanë bërë betejat më të fuqishme që ka njohur opozitarizmi në Shqipëri.
Paraqitet me specialistë të shquar, me përfaqëues të inteligjencës shqiptare, të diasporës, të komuniteteve të ndryshme, dhe ndonjëherë nuk ka pasur ndonjë përfaqësi kaq të plotë para zgjedhësve shqiptarë.
Përfaqësohen gra të shquara, të rinj të vendosur dhe energjikë.
Pra, kryesia do bëjë përzgjedhjen përfundimtare të këtyre kandidaturave dhe jam i bindur se impakti i tyre tek qytetarët shqiptarë do jetë i një fakti që ndez peshë, çon peshë zemrat e tyre.
Natyrisht kjo garë elektorale, e cila ka krijuar siç keni parë vetë një klimë të pashembullt nga ’90-a gjer sot, ka si frymëzim programin e PD, një program që në shtyllat e tij, në paketën e dhembshurisë, në shtyllën Made in Albania, Shqipëria Madhështore është programi në distancë më i mirë që kanë pasur ndonjëherë shqiptarët para tyre, dhe programi më realist.
