Kryetari i Komisionit Qendror të Zgjedhjeve, Klement Zguri ka raportuar në Kuvend për punën e insitucionit që drejton. Ai ka thënë se për zgjedhje të suksesshme, duhet vetëkufizim i politikës.
“Politika të ketë më shumë vetëkufizim që zgjedhjet të kenë sukses. Duhet një reformë e thellë zgjedhore për trajtimin e problematikave. Kemi bashkëpunuar ngushtë me partnerët ndërkombëtarë për trajnimin e komisioneve”, është shprehur Zguri.
Ndër të tjera, në fjalën e tij Zguri u ndal edhe në akuzat që i bëhen Partisë Demokratike për lobim në Shtetet e Bashkuara të Amerikës dhe financime të paligjshme. Zguri ka thënë se ai ka kërkuar hetimin e thelluar për këtë gjë, por është hedhur poshtë nga anëtarët e tjerë të Komisionit Qendror të Zgjedhjeve.
“KQZ ka shqyrtuar edhe lidhjen e Partisë Demokratike me kompani të huaja, administrata e KQZ-së me mbështetjen time si kryetar, propozoi hetime të thelluara brenda mundësive dhe ligjeve që zbaton KQZ-ja. Por kjo hasi në kundërshtim nga anëtarët e Komisionit, gjë që ia hoqi mundësinë KQZ-së të thellohej. Nuk ka asnjë dispozitë, që përcakton për hetim të thelluar e aq më tepër transaksione jashtë vendit në lidhje me fushatat zgjedhore. Nga praktikat e vendeve që kanë institucione të konsoliduara, rezulton se këto institucione kanë procedura dhe kompetenca të mirëpërcaktuara dhe burime njerëzore të konsiderueshme. KQZ nuk mund të ngrejë struktura të specializuara pa pasur kompetenca të sakta”, ka thënë Zguri gjatë fjalës së tij në sallën e Kuvendit./Opinion.al
